Umpatod

Gulu no banal, i Pdt. Traugott A. Forschner o minongumpug dit ongoboros sid kamus diti sid buuk dau, i Register of Roots in the Rungus Dialect -- Pongumpugan dit ongopuun dot pongoretan do Rungus. Binuuk di Basel Mission (biano Mission 21) di hiza diri om kentolu no pirino di toun 1992 sid Kudat. Toun 2009 po, nipemot no di Amai i kamus dau sid laman web dau. Biano no iti kamus diti nagama no, do sid hempon nga obuka-i (imatai Google Play).

Nopongo po di Amai Forschner monusun, inatagan no di Johnny K. Sokuroh i Register of Roots (Rungus - Inggeris) dino, om binuuk dau di toun 2013 sid Kudat, Sabah, do Pu'un do boros Momogun Rungus Rootwords (Momogun Rungus - English) ot ulu do boros.

Toun 2005 po, tinahakan okoi dioti miduvo di kamus dioti do sid ongofail komputer. I tomodon dioti dino, ino no atagan om omungan i kamus dino sampai suvangan po do boros Malazu. Jadi yokoi it Umpug Monusun Kamus Rungus (do pitabangan dot SIL) minagavi okoi no sino, sampai i Pdt. Parasin Bongkol pinosuvang di kogumuai it ongoharati do Malazu.

Iri ogi sinuhu dahai i Tracy Moketong, do pitabangan dot SIL, do mangatag om momongo di kamus diti om pamung po dit ongoayat suntu. Iti no i gamaon dau sino sampai biano.

Manjadi i kamus diti dang bansa do Rungus, okonko dang ulun vokon. Tu it ongoRungus no o pinatahakan dioti Forschner i nagama dioti. Nga toudon dot SIL i kamus diti do mongontok di bansa do Rungus, supaya apakai dit ongoRungus dot ombo kenginan om kogunaanon dioti.